Уште колку време ќе опстане Охрид како на овие фотографии? Алармот за спас на градот и езерото е вклучен. Охрид се мобилизира да се спротивстави на урбаните амбиции на функционерите, на нивните заборавени предизборни ветувања, на желбите да остават свој печат па ако треба да го покријат печатот на природата. По Скопје, Охрид станува мета на невкусот и кичот, на плановите да се ќари евтина парцела до брегот, па ако треба и да се уништи природата.
По плановите за хотели и казина во Љубаништа, урбанизација на просторот под Плаошник, информациите за плановите за отстранување на трската од езерото, сега се чепна и во Студенчишкото блато.
Со почетокот на проширувањето и изградбата на пешачката патека во близина на мостот кај каналот Студенчишта е означен почетокот на згаснувањето на едно од најголемите природни богатства на Охрид, Студенчишкото блато.
Градежните активности кои започнаа деновиве го вклучија црвеното светло кај граѓаните.
Во Охрид формирана е граѓанска иницијатива „Охрид SOS“ за заштита на животната средина и културното наследство во Охрид и околу Охридското Езеро.
Тие апелираат Студенчишкото блато како реткост по секоја цена да се заштити. Охрид е на потег – ќе дозволи градот да се претвори во кич од пластики , алуминиум и бетонски плочи или ќе застане на страната на природата. Фотографиите се на еден од основачите на иницијативата “СОС Охрид“ , Петар Бавчанџиев, која на фејсбук има веќе поддршка од 1000 охриѓани.
