Ние имаме визија и сакаме овој објект да биде однегуван и обновен, но неговата автентичност да се задржи, рече Даница Павловска од иницијативата „Го сакам ГТЦ“ и поранешна претседателка на ААМ, на денешната прес конференција со градоначалникот на Општина Центар, Андреј Жерновски каде беше најавено дека на 26-ти април ќе се одржи референдум на кој граѓаните ќе одлучуваат за изгледот на Градскиот трговски центар.
Референдумот беше идеја на Асоцијацијата на архитекти на Македонија (ААМ) и беше предложен пред осум месеци. Павловска вели дека процесот за спас на комплексот трае веќе две години и дека до сега се собрани 4960 потписи на петицијата, а околу 5.000 граѓани ја дале нивната поддршка.
– ГТЦ е дел од духот и културата на ова место. Следен наш чекор е предлог да се изготви архитектонски проект за интервенција на објектот, но со научна базичност и восока стручност, низ кој ќе може да му се подобрат перформансите затоа што знаеме дека постои енергетска ефикасност и можни решенија кои можат да ја подобрат неговата суштина. Не отфрламе обнова или реконструкција на комплексот. Тој е наше секојдневие, реалност и наш простор – рече Павловска.
Референдумот е многу важен и најдемократски начин или форма, посочи таа. Во меѓувреме група на архитекти и членови на еснафот покрена иницијатива за прогласување на ГТЦ за културно наследство. Павловска посочи дека само така може да се гради иднината на овој комплекс и ги повика граѓаните да гласаат на референдумот.
– Очекуваме во поддршката да ни се приклучат невладини организации, здруженија и истомисленици. Во акцијата која би требало да следи ќе покажеме колку сме свесни – рече таа.
Маја Васева