На прес конференција, лидерот на СДСМ, Зоран Заев, одговарајќи на новинарски прашања, беше дециден, дека не може никој да ги уплаши бидејќи се работи за слобода и демократија.
На прашањето зошто сега поднел пријава против бизнисменот кој му местел поткуп, а се знаело пред година и пол, Заев рече дека со оваа власт не се знае на што е спремна, само да ја спаси кожата на Груевски и фамилијата.
„Ќе има судски процеси. Последните денови се гледаше местенката. Тој човек можеше и дента пред Универзална сала да се обиде со полиција да ми подметне пари. Не знаете до кај оди ова беснило и лудило. А каде да пријавам? Од кого да барам правда? Од фамилијата и Мијалков? Да пријавам кај Зврлевски и Илиевски?“, праша Заев.
Заев беше јасен, никој, ниту ДУИ, ниту ДПА, нема да биде поштеден. Ќе биде објавено се и сите кои правеле и договарале криминал.