Министерот за надворешни работи Никола Попоски во рамки на официјалната посета на Турција беше примен од турскиот претседател Реџеп Таип Ердоган и имаше обраќање во Дирекцијата на Турците во странство.
Во обраќањето, соопшти МНР, Попоски истакна дека пријателството меѓу двете земји се потврдува преку интензивните билатерални односи, но истовремено и преку личниот контакт на граѓаните на двете земји и нивниот интерес за негување на традициите, меѓусебно запознавање и соработка. Во тој контекст, ги спомена контактите и иницијативите на македонското иселеништво во Турција и турската заедница во Македонија, кои претставуваат цврст мост за продлабочување на соработката меѓу двете земји.
На настанот присуствуваа официјални претставници на Република Турција, дипломатскиот кор, претставници на студенти од Република Македонија кои студираат во Република Турција, претставници на здруженија на македонски иселеници, турски бизнисмени и организации кои соработуваат со Република Македонија.