ВМРО – ДПМНЕ во пишана реакција на соопштението на СДСМ за изборот на Бранко Ушковски за претседател на Судскиот совет вели дека нападот на опозицијата против судството е одбрана на криминалот на Зоран Заев и неколку луѓе од раководството на партијата.
– Во изминатите неколку години направени се огромен број законски измени и реформи со цел да се зголеми професионалноста во судскиот систем, континуирано да се подобрува ефикасноста и квалитетот на работата на судовите, стои во реакцијата.
СДСМ, како што е наведено, се обидува свесно да го дерогира системот во Македонија, за да можат неаргументирано да ги критикуваат сите судски пресуди за криминалите во кои се замешани.
– Сме се соочиле се предизвиците и се справуваме со нив. Свесни сме и ние, но и граѓаните, каков судски систем наследивме од СДСМ. Токму СДСМ беше партијата која во Собранието директно изгласа 617 судии во само една ноќ, сите според листата на подобни судии која ја правеа во нивната партиска централа. Истите тие партиски инструирани судии потоа молчеа за грабежот на општествениот капитал, за криминалната транзиција и богатењето на партиската олигархија на СДСМ, се вели во реакцијата на ВМРО – ДПМНЕ.