Секојдневно згаснуваат дуќаните во охридската чаршија. Економската состојба на граѓаните и огромните казни од инспекциите кои секој ден се по дуќаните се едни од основните причини за ваквиот тренд.
Трговскиот центар „Амам“ кој се наоѓа на средината од охридската чаршија е скоро празен. На вториот кат, најголемиот дел од продавниците се празни. Огромните кирии кои се плаќаат за изнајмување на деловните простории се една од главните причини за ваквата состојба. Закупнините за просториите се движат од неколку стотини евра, па дури и до неколку илјади евра за еден месец.
Имајќи во предвид дека Охрид е еден од градовите од кои константно најмногу се иселува населението, особено младата популација и лошата економска состојба на граѓаните, како и нискиот стандард на живот, исто така е дел од алката причини за затворањето на дуќаните. Сопствениците на дуќаните коментираат дека после 20 часот никој не ни поминува по чаршијата.
Инспекциските контроли кои секојдневно се присутни низ охридската чаршија, како и огромните казни се најголемиот страв кој го имаат трговците. Тие коментираат дека со една изречена казна од инспекциите, слободно можат да го затворат својот бизнис.
Откако ќе ми изречат само една повисока казна кои инспекторите секој ден ги пишуваат, јас слободно можам да го удрам клучот на врата и да го затворам мојот бизнис. И онака превисоките кирии кои ги плаќаме едвај ги покриваме, а да треба да платиме казна од неколку илјади евра не ни преостанува ништо друго – вели трговец кој има мал бизнис во чаршијата.
Трговците велат дека и давачките кон државата се огромни за разлика од стандардот. Даноците кои ги плаќаат секој месец не се сразмерно со побарувачката и потрошувачката, како и со заработката која ја имаат.
Охрид и натаму тоне на економски план. Најголемиот дел од населението се занимаваат со туризам, но и таа гранка од година во година е се послаба. Прометот и профитот кој трговците, посебно угостителските го правеа во 2008 – 2009 година ќе остане само убаво сеќавање.
Ф.Ј.