Луѓето од МРТВ, за жал, не’ изневерија сите нас, потфрлија во обврските кон своите граѓани. Не сите, има многумина чесни професионалци, има и чесни новинари, но одговорноста е на главните уредници и директорите.
Тие ја изневерија новинарската професија, своите колеги и најважно од се’, тие ја изневерија јавноста, беше речено на денешниот перформанс пред зградата на МРТ – Некои од нив ги познавам лично и знам дека се свесни и многу добро знаат што прават.
Тие не се уредници и главни уредници, тие се бесни партиски навивачи. И ако нешто научивме деновиве, од сите оние снимки е дека – не Илија, ами полицијата уредува вести во медиумите, рече Сашка Цветковска, новинар.
Таа ги охрабри новинарите од јавниот сервис да го земат за своето оружје во раце – зборот, мислата.
– Заборавиле или не знаат колегите дека тие се формирани со одлука на Собранието, во домот на граѓаните. Заборавиле дека државата не е партијата.
Дека нивни единствени газди се граѓаните. А се што ние во согласност со законот бараме од нив е да ги почитуваат универзалните принципи на професијата новинар кои се дел од сите етички кодекси во редакциите низ светот. Затоа ги основавме и за тоа постојат.
Ако не се пронаоѓаат во тој повик, во таа благородна мисија нека бидат чесни и нека си заминат, рече Цветковска