Претставникот на ОБСЕ за Слобода на медиумите, Дуња Мијатовиќ, денеска повика на брза истрага за прислушувањето на македонските новинари.
“Прислушување и следење на новинари е неприфатливо. Ова само дополнително ја слабее веќе загрозената слобода на медиумите”, изјави Мијатовиќ.
Дел од новинарите од СДСМ добија транскрипти од прислушуваните разговори.
“Ова е тешка повреда на правата на новинарите да ја завршат својата работа и да ги заштитат своите извори. Ова мора да се испита во брз, транспарентен и независен процес, а нарачателите на прислушувањето мора да бидат изведени пред лицето на правдата”, рече Мијатовиќ.
Претставникот на ОБСЕ за слобода на медиумите потенцира дека ќе ги набљудува случувањата.