Либерално демократската партија (ЛДП) денеска го пренесе официјалниот став на претседавачот на Алијанса на либерали и демократи во Парламентарното собрание на Европа (АЛДЕ), Жорди Ксукла искажан и објавен на 23.02.2015 година со цел, како што се вели, да не се злоупотребуваат и извртуваат одредени тези и ставови за исполнување на дневно-политички цели.
Изјавата на претседавачот на АЛДЕ е објавена на официјалната веб страница на АЛДЕ.
„АЛДЕ со голема загриженост ја следи политичката криза во Македонија. Со оглед на новите моменти кои излегоа во изминатиот период, јас како претседател на АЛДЕ ќе го известам Комитетот за Мониторинг за тежината на ситуацијата и ќе го охрабрам да преземе соодветни дејства.
АЛДЕ цврсто верува во недвосмислената потреба од изнаоѓање на демократско решение за долготрајната криза во Македонија. Сето ова треба да биде изведено во согласност со принципите на владеење на правото и човековите права, принципи кои се особено ценети од сите либерали. Сите сериозни обвинувања кои испливаа на површина мора да бидат истражени во целосна согласност со заложбите на кои Македонија е обврзана со самото пристапување во Советот на Европа. Независноста на правдата е врвен императив“, стои на официјалната веб-страна на АЛДЕ.