САД предложиле до Советот за безбедност на ОН да воведе санкции спрема двете страни во конфликтот во Јужен Судан каде престрелки продолжуваат и покрај неколкуте договори за прекин на огнот.
Според дипломатски извор, веќе се разгледува нацрт-резолуција со која би се формирала комисија за санкции што ќе воведе ограничени мерки по судирите меѓу приврзаници на претседателот Салва Киир и поранешниот негов заменик Риек Мачар.
Од крајот на 2013 година во Јужен Судан е хаос откако борбата за власт прерасна во етнички мотивирана граѓанска војна. Државата доби независност две години претходно. Во конфликтот загинаа десетици илјади луѓе, и речиси два милиона се принудно раселени.
Најновото примирје беше потпишано на 1 февруари со кое се предвидува поделба на власта меѓу Владата и бунтовниците. Во почетокот на неделата вооружена група киднапира 89 малолетни момчиња кои најверојатно ќе бидат принудени да бидат деца војници.