Социјалната мрежа „Фејсбук“ работи на апликација што ќе овозможи на корисниците сами да создаваат сопствени содржини од виртуелна реалност.
„Фејсбук“ во март минатата година за две милијарди долари ја презема компанијата „Окулус“, позната по производство на уреди за виртуелна реалност. Компанијата сега потврди дека работи на апликација за виртуелна реалност со помош на која корисниците ќе може да создаваат сопствени содржини.
Директорот за производи на „Фејсбук“ Крис Кокс на конференцијата „Код/Медија“ во Калифорнија потврди дека компанијата работи на сопствена апликација за виртуелна реалност.
Виртуелната реалност е особено „кул“, изјави Кокс, без да открие многу детали за тоа како корисниците ќе создаваат сопствени содржини со виртуелна реалност, ниту кога тоа може да стане реалност.
Сепак, Кокс призна дека најверојатно сме многу далеку од тоа сите да имаат такви уреди.