Во атарот на селото Кучково, кај Скопје, денеска по повод празникот Свети Трифун архиепископот на Македонската православна црква-ОА г.г. Стефан традиционално изврши закројување на лозата во црковниот двор на манастирчето Свети Трифун.
Беше осветена и трифунска вода и славска погача која брзо потоа им беше поделена на бројните верници дојдени на собирот по повод денешниот празник.
– Заедно се собираме и го одбележуваме овој празник онака како што доликува. Да се помолиме и да започнеме односно да направиме почеток на закројувањето на лозјата во овој град. Честит празник на сите и дај боже според трудот Господ да не дарува, а Македонија покрај многуте убавини и плодови што ги донесува и ги раѓа македонската земја грозјето и виното секако се меѓу првите места, рече г.г. Стефан.
Свети Трифун денеска, како и години наназад меѓу народот го чествуваа и градоначалникот на општина Ѓорче Петров, Сокол Митревски и бизнисменот Трифун Костовски.
– Јас сакам една голема благодарност да искажам до кумовите, до неговото блаженство кој секоја година на овој ден христијански се наоѓа на падините над селото Кучково на манстирот Свети Трифун и од овде се упатува благословот за богат род на македонските полиња и на македонските земјоделци, рече Митрески.