Пелагонискиот кризен штаб на претпладневната седница одлучи да испрати дополнителна градежна механизација во Могила и Новаци со цел да се санираат последиците од поплавите и зајакнат насипите затоа што се очекува ново надоаѓање на водите од реката Црна.
На средбата со новинарите во Битола, раководителот на Дирекцијата за заштита и спасување-одделение во Битола, Димче Јошевски, соопшти дека во општина Новаци донесени се нови 15 пумпи за испумпување на водата во дворовите на најпоплавените куќи.
-Утрово почнавме и посебна акција, транспортирање на работници на ЕВН со чамец во атарот на селото Егри за да може да се поправи една трафостаница и продолжи снабдувањето со електрична енергија. Според првичните проценки, длабочината на водата кај селото Егри е околу 2,5 метри, посочи Јошевски.
Стручни тимови на ЈЗУ Центар за јавно здравје-Битола продолжуваат со континуирани активности на терен, на повеќе населени места се врши хиперхлорирање на водата за пиење, а забраната да не се користи вода од индивидуални водоводи и бунари и понатаму е на сила.
– Неизвесноста продолжува, но ние остануваме на терен и ќе интервенираме со сите расположливи сили, истакна битолскиот градоначалник Владимир Талески по седницата на пелагонискиот Кризен штаб што се одржа претпладнево во Битола.