Триесетина граѓани на општина Гевгелија пријавиле штети од невремето и поројните дождови што го зафатија регионот на 23 јануари, информира денеска општинската служба за односи со јавноста.
Најголем број се жители на селата Моин, Негорци и Мрзенци кои пријавиле поплавени земјоделски површини со посеви во најпогодените подрачја. Штета пријави и градежната фирма „Еуроинг“ од Гевгелија чии машини, ангажирани во изградбата на Пречистителната станица, беа заробени од надојдената вода на Сува река.
Општинската комисија за проценка на штети од елементарни непогоди денеска излезе на терен за да ја утврди состојбата врз основа на пристигнатите пријави и да ги процени настанатите штети.