Кејот „Македонија“ покрај Охридското Езеро во центарот на Охрид денеска беше преполн со ѓубре. Сликата која граѓаните денеска можеа да ја забележат во центарот на градот не беше баш пријатна.
Голем дел од жителите реагираат на ваквиот однос кон најголемото природно богатство кое го има Охрид.
Во изминатиов период, раководството на Јавното претпријатие „Охридски Комуналец“ често беше подложено на критики поради ненавременото подигање на ѓубрето во центарот на Охрид.
Градоначалникот Бакрачески, пред неколку дена, на вонреден состанок ги повика сите раководни лица во претпријатието затоа што, како што пишуваа одредени медиуми, некој му правел опструкции и ѓубрето намерно не се подигало.
Охрид добива милионски суми финансиски средства за заштита на Охридското Езеро. Јавноста се прашува за што се искористуваат тие средства, кога секојдневно може да се видат вакви слики.
Ф.Ј.