Секторот за внатрешни работи Тетово-Полициска станица Гостивар, до Основното јавно обвинителство Гостивар поднесе кривична пријава против 25-годишниот Ф.Б. и неговиот 26-годишен брат Г. Б. од Дебар, осомничени дека сториле кривично дело „недозволено изработување, држење и тргување со оружје или распрскувачки материи’’.
МВР денеска соопшти дека двајцата пријавени дебрани на 28-ми овој месец движејќи се со возило „Голф’’ по регионалниот пат Дебар-Маврови Анови, во близина на „Жировничко анче’’, околу 15 часот и 30 минути биле запрени од полициски службеници на Полициската станица за граничен надзор Жировница. При преглед на нивното возило, пред совозачкото седиште пронајдени се три торби во кои се наоѓале четири лимени сандаци со вкупно 2.170 куршуми за автоматска пушка, калибар 7,62 милиметри од кинеско производство, долго зрно.
Едниот од нив односно Г.Б се обидел да избега, додека неговиот помлад брат кој го управувал возилото, да ги фрли торбите покрај патот. Но, и двајцата осомничени набрзо биле совладани и приведени во Полицисјата станица за ГН Жировница, а потоа и пренесени во Полициската станица Гостивар.
Со кривичната пријава, вчера тие беа изведени пред Истражен судија на Основниот суд Гостивар, кој им определи мерка притвор од 48 часа.
