Велес ќе биде Град на културата за 2015 година. Општината вторпат ја добива оваа титула, која Министерството за култура ја доделува 12 години. На конкурсот за 2015 година, стигнале пријави и од Неготино и од Струмица, а Велес бил едногласно избран од комисијата.
Министерката за култура, Елизабета Канческа-Милевска, денеска на прес-конференција рече дека од Општина Велес примиле комплексна програма со повеќе од 200 настани и со 67 манифестации од различни дејности, сите со точно одредени термини на одржување.
– Велес вторпат го добива приматот и го заслужува овој престижен статус. Сите инвестициски зафати што ги реализираа и Владата и Општината, ќе дадат огромна можност за реализација на голем број активности од програмата со која Велес конкурираше. Таа е целосно осмислена и конципирана, со крупни настани и со точни термини – рече Канческа-Милевска.