Само 17 отсто од Французите стравуваат по џихадистичките напади во кои 17 нивни сонародници ги изгубија животите, покажува испитувањето на јавното мислење на „Одокса“ за весникот „Паризиен Диманп/Ожурдуи ан Франс“, јави дописникот на МИА од Париз.
На прашањето кои чувства преовладуваат кај вас по последните настани, 61 отсто изјавиле „бес“, 49 проценти „мачнина“, 46 отсто „солидарност“ и 17 проценти „страв“.
Во истото испитување 81 отсто од Французите велат дека се подготвени да се мобилизираат за да им оддадат почит на жртвите во терористичкиот напад, додека 18 проценти одговориле негативно.
Што се однесува до повикот за „национално единство“, 79 отсто од испитаниците изјавиле дека тоа е добар одговор, бидејќи покажува дека демократијата е посилна од тероризмот. Само 20 проценти мислат дека тоа е лош став, бидејќи е лицемерен одговор на политичарите.