Спортско-рекреативна опрема доби Здружението на слепи лица,глуви и лица со телесна попреченост. Спортско-рекреативната опрема, статичен велосипед и магнетна механичка лента се сместени во спортската сала што се наоѓа во објектот на Центар за социјални грижи, во битолската населба „Карпош“, а ја донираше Лајонс клубот во Битола.
-Денешната донација, велосипед и подвижна лента ќе ја користиме максимално, бидејќи во нашиот град, полн со сокаци и тесни улици ние слепите луѓе тешко може да се движиме, најмалку со бело стапче, но затоа пак ќе можеме да се рекреираме и спортуваме во нашата спортска сала. Ние не гледаме со очи, но гледаме со срце и ја чувствуваме искрената поддршка, рече Стевче Костадиновски, претседател на Здружение на слепи лица-Битола.
Вредноста на донацијата изнесува 20.000 денари, но во реализацијата на хуманитарната акција вложени се и повеќе од 150 волонтерски часови, информираа од Лајон Клуб Битола на денешната прес конференција.
– Имавме повеќе мотиви за да ја реализираме денешната донација. Најнапред цврстата соработка со нашата целна група. Потоа, националниот имиџ проект „Сакам велосипед“ и „Да спортуваме и да се дружиме“, како и желбата да помогнеме на слепите лица, глуви и лица со телесна спреченост да водат здрав живот, истакна Марјан Танушевски, претседател на Лајонс клуб – Битола.
