Екипи на Општина Велес и СВР Велес денеска започнаа со заедничка реализација на акцијата „Чист град“.
Како што информира Мартин Мајсторов портпарол на Општина Велес, започнувањето на оваа активност се реализира со цел да се евидентираат и да се отстранат нерегистрираните, хаварисаните и запуштените моторни возила, приколките и камп-приколките, тракторите, земјоделските машини и алатки, од отворени простори и јавно сообраќајните површини, заради создавање на услови за безбеден и уреден сообраќај и здрава животна средина.
– Во првата фаза која започна денеска и ќе трае седум дена ќе се врши континуирано информирање на граѓаните за нивните обврски согласно прописите. Екипа на СВР Велес и Општина Велес започнаа со контрола на состојбата на улиците , паркинг просторите пред и зад стамбените згради како и јавните паркиралишта и јавните површини,потенцира Мајсторов.
Утврдените прекршоци ќе се документираат и фотографираат, а сопствениците на нерегистрираните, хаварисаните и запуштените моторни возила, приколките и камп-приколките, тракторите, земјоделските машини и алатки, ќе бидат известени да ги отстранат истите во рок од седум дена.
– Доколку сопствениците не постапат по добиеното известување, во втората фаза ќе се применат репресивни мерки согласно прописите односно согласно Законот за безбедност на сообраќајот на патиштата, Законот за возила, Законот за јавна чистота, Законот за комуналните дејности и Одлуката за комунален ред и мерки на Општина Велес, потенцира Мајсторов.