Со воведувањето на задолжницата и Законот за финансиска дисциплина, односно со осигурувањето на побарувањата и утврдувањето на конкретни рокови за плаќањето на обврските, треба да прекине практиката на неплаќање која е општо присутна, наведува ВМРО-ДПМНЕ во реакција на прес-конференцијата на Драган Тевдовски од СДСМ.
Според ВМРО-ДПМНЕ, „разбирливо е за експертите на СДСМ, како партија која ја негувала сивата економија, да бидат против воведувањето ред и дисциплина во плаќањето на обврските и со тоа обезбедување ликвидност во стопанството“.
Културата на неплаќање на обврските која постои, односно и добростоечки фирми да доцнат со исплатата на своите обврски, укажува ВМРО-ДПМНЕ, е лоша и за стопанството и за економијата во целина. Токму затоа самите фирми побараа да се воведат инструменти како задолжницата и финансиската дисциплина.
– Ова е практика и на други земји кои се членки на ЕУ каде роковите се фиксни и каде се штитат оние кои работат согласно законите и пазарните правила. Задолжницата ќе придонесе за работите да тргнат на подобро во стопанството, чиста сметка, подобрена ликвидност, се вели во реакцијата.
