Претседателот на Република Српска Милорад Додик денеска ја предложи Жељка Цвијановиќ за мандатар на новиот состав на владата на РС, а очекувањата се дека ново-стариот премиер во парламентот на РС ќе биде потврден меѓу 15 и 20 декември.
Додик ги демантираше шпекулациите дека внатре во неговата партија Сојуз на независни социјалдемократи (СНДС) не постои согласност во врска со именувањето на мандатарот, истакнувајќи дека предлогот е усвоен со консензус во партијата, како и во целата коалиција СНДС-ДНС-СП.
Тој дополни дека Цвијановиќ ќе има поддршка и од двајца независни пратеници во Парламентот, што значи дека за нејзиниот мандат ќе кренат рака најмалку 44 пратеници.
– Моја и на новиот мандатар цел е да ја зајакнеме институционалната сила на РС. Избирајќи таква личност во ниту еден момент немав двоумење во тој поглед, нагласи Додик.