Денеска, во Основниот суд во Охрид се одржа главното рочиште за аферата „Лизгалиште“. Во судскиот процес, секретарот на Општина Охрид Димитар Спасески бара оштета од советникот во Советот на Општина Охрид, Дејан Блажески во висина од 300.000 денари за наводна клевета и претрпена душевна болка.
Двете страни ги изнесоа своите излагања пред судот во Охрид и ги изложија своите аргументи. Спорот се води по политичката пресметка во медиумите околу сомнителниот договор за поставување на лизгалиштето на градскиот плоштад во Охрид минатата година околу новогодишните и божиќните празници. Секретарот Спасески по своето излагање го напушти рочиштето и не даде изјава за медиумите.
Советникот на ЛДП во Охрид, Дејан Блажески потенцираше дека секретарот Спасески немаше доблест ниту да го сослуша неговото излагање.
Од изнесеното видовте дека тужителот беше конфузен на прашањата кои му ги поставуваше адвокатот дури немаше ни за доблест да остане да ме сослуша јас што ќе кажам. Видовте сите дека предвреме ја напушти седницата. Дрскоста оди до тоа што прашање од интерес на граѓаните сакаат да го свртат дека се води лична битка. Блажески Дејан не води лична битка со Спасески затоа што не ни можам да водам битка со човек во кој што играм во различна лига од мојата со спротивни определби – рече Блажески по завршување на рочиштето.
Тој додаде дека ќе продолжи да ги изнесува во јавност оние работи што се надлежности и него но и на Локалната самоуправа.
Во интерес на граѓаните до крај ќе се трудам и обзнанувам сите работи кои се однесуваат на она што е работа и надлежности, пред се мене како советник што ги носи советничката функција и обврските на Локалната самоуправа. Погледнавте дека прво баснословна е сумата од 300.000 денари за поставено прашање – додаде Блажески.
Советникот Блажески повтори и упати критика до адвокатите кои тој ги контактирал дека не биле професионални и не сакале да го бранат во овој случај и рече дека немал доверба во институциите на системот.
Адвокатите во Охрид не беа професионални и морам јавно да ги искритикувам оние кои ги контактирав и кои не сакаа да ме бранат. Јас пред судијата приложив документи кои што се без архивски броеви, документи кои што се спорни и се контрадикторни со оние изјави кои што ги даваат дека е урбана опрема. Јас дури го имав повикано и јавниот обвинител, а до денес никој не ме има контактирано. Битката ја продолжувам институционално иако морам да бидам искрен и да кажам дека јас не верувам во институциите на системот – заврши Блажески.