„Нескромно е ако кажам дека во 2014-та Охрид ќе го претвориме во едно големо градилиште“ е реченицата со која градоначалникот на Охрид, Никола Бакрачески ја започна оваа година директно од својот кабинет по работната средба која ја имаше со раководителите на секторите во Општина Охрид.
Бакрачески тогаш изјави дека во тековната година ќе се инвестира во голем дел на инфраструктурни проекти.
„Реконструкција и изградба на улицата „Ристо Чадо“. Изградба на две кружни сообраќајници на делот каде Булеварот „Туристичка“ се вкрстува со улиците „Бистрица“ и „7-ми Ноември“.Изградба на патот од Кромидишта до населбата Рача. Реконструкција на улицата Илија Смически во село Лескоец, реконструкција на патот Косел – Вапила – Ливоишта.
– Во втората фаза ќе биде изградена и реконструирана улицата „Прва Македонска Ударна Бригада“, ќе бидат реконструирани улиците низ сите охридски села“, истакна на почетокот на 2014-та година градоначалникот Бакрачески.
После истиот состанок, Бакрачески рече и дека ќе започна со градба затворениот зелен пазар, најави замена на уличните постоечки светилки со штедливи како и почеток на изградбата на долго најавуваниот затворен базен.
На крајот од 2014-та година, Бакрачески со речиси идентични зборови ја убедува јавноста дека 2015-та година ќе била година на градежна експанзија во Охрид. Пред почетокот на 2015-та година, тој ги уверува охриѓани дека во март или април Општина Охрид ќе започнела со крупни инфраструктурни проекти пред се во делот на градба односно реконструкција и адаптација на неколку главни сообраќајници. Бакрачески спомнува голем дел од минатогодишните проекти кои ги најави за оваа година, а сега најавува дека ќе ги реализирал во наредната.
Сега тој споменува дека ќе градел дури пет кружни текови од кои дел се од оние кои не се изградени во 2014-та година. Споменува дека ќе се градела улицата „Илија Смически“ во селото Лескоец, заборавајќи дека таа беше дел од „градилиштето“ кое сензационално го најави за во 2014-та година. Улиците „Ристо Чадо“ и „Прва Македонска Ударна Бригада“ не само што не се реконструирани, туку се во полоша состојба, а ниту нив не ги видовме во големото „градилиште“ во Охрид.
Бакрачески очекувал кон крајот на оваа година или почетокот на наредната да се започне со изградба на затворениот зелен пазар, кој и минатата година само што не започна да се гради. Во 2015-та година конечно ќе започнела изградбата за затворениот пливачки базен, иако самиот имаше претходно најавено дека изградбата ќе започне минатиот април, па почетокот го одложи за септември, но се уште ни трага ни глас од фамозниот базен кој ВМРО – ДПМНЕ го ветуваше на граѓаните уште од 2006-та година.
Ф.Ј.