Претседателот на Социјалистичката партија Љубисав Иванов Ѕинго одлучил да се откаже од пратеничкиот мандат, дознава А1.
Ѕинго веќе поднел барање до собраниската комисија да го разреши од функцијата.
Портпаролот на партијата, Малиша Станковиќ, за А1, потврди дека Ѕинго се одлучил на овој чекор поради лични причини, но и дека останува и натаму претседател на Социјалистичката партија.
На местото на Ѕинго после неговото повлекување, како пратеник доаѓа Марија Рашковска од ВМРО-ДПМНЕ.
Во Собранието Социјалистичката партија останува со два пратеници, Малиша Станковиќ и Владанка Авировиќ.
Повлекувањето на Ѕинго од пратеничката функција се поврзува со рокот што го постави СРД до 30 септември сопствениците на Канал 5 и Сител да се одлучат дали ќе ги задржат медиумите или ќе ја задржат функцијата.
Според законот за радиодифузија, не може вршители на функција и членови на нивното потесно семејство да имаат сопственичка структура во медиуми.