Новата Итна медицинска помош во струшкото село Лабуништа ќе опслужува повеќе од 7.000 илјади жители од ова село и 2.000 жители од околните места, со што наскоро здравството ќе стане 24 часа достапно за повеќе од 9.000 жители од струшкиот регион, рече денеска на прес-конференција пратеничката од ВМРО-ДПМНЕ Нола Исмајлоска.
Според Исмајлоска, итната медицинска помош во Лабуништа решава еден од најгорливите проблеми со кои се соочуваа жителите на ова село.
– Жителите од овој дел на Македонија со години беа запоставувани и никој досега не ги слушна нивните проблеми, потреби и сугестии, ниту пак ги реши. Сите ветуваат, но никој не оствари. Затоа ова преставува еден огромен успех.Сите граѓани на Република Македонија имаат право на здравствена услуга по највисоки стандарди, што е неопходно за здрав и квалитетен живот. Токму затоа решавањето на овој проблем е од огромно значење за жителите на Лабуништа, наведе Исмајлоска.
Според Исмајлоска, проблемот на жителите од Лабуништа со немањето брза помош се решава како резултат на секојдневната комуникација со граѓаните низ цела Македонија.
– Ова е само една од многуте мерки и инвестиции кои се веќе завршени или се во фаза на реализација со кои значително ќе се подобри квалитетот на живеење на жителите на село Лабуништа, рече Исмајлоска и најави дека покрај итната медицинска помош во скоро време жителите ќе добијат и мултифункционално игралиште.