„Каде се субвенциите за земјоделците, неисплатени сеуште за 2013 година, ако е толку силна определбата на власта на Груевски кон земјоделството?
Срамно е објаснувањето на Груевски дека токму за субвенциите имало процедурални и технички причини поради што тие останале неисплатени.
Требаше да се слушнат најави за протести со кои земјоделците ќе си ги бараат законските права, за наводно посветената власт и Груевски да мора да најави исплата на заостанатите субвенции и почеток на исплата на субвенциите за житните култури за 2014 година и тоа на месец ипол пред крај на годината“, изјави Панче Орцев, пратеник и член на Комисијата за земјоделство, шумарство и водостопанство на СДСМ.
„Така не се планира производство и ова не е посветеност.
Почитта на земјоделскиот труд значи редовно субвеницонирање. Само така земјоделецот може да го планира своето производство.
Еве ги разликите од планираното до реализираното.
Во 2013 година на земјоделците им се исплатени околу 40 милиони евра помалку од планираните.
Од 2010 до 2013 во просек земјоделците добивале над 30 милиони евра помалку по година во однос на предвидените пари во Буџетот.
| Показател | 2010 | 2011 | 2012 | 2013 | Вкупно | Просек |
| Планиран износ во буџет | 99.036 | 110.098 | 127.663 | 135.049 | 471.846 | 117.962 |
| Исплатен износ по завршна сметка на буџет | 79.575 | 64.918 | 92.500 | 95.840 | 332.841 | 83.210 |
| Разлика | 19.461 | 45.180 | 35.163 | 39.200 | 139.004 | 34.752 |
| Однос-испитано: планирано (%) | 80,3 | 59,0 | 72,4 | 70,9 | 70,5 | 70,5 |
*Податоците се од завршните сметки на буџетите објавени во Службен весник на РМ бр. 138 – 2011, 114-2012, 157-2013 и 107-2014 год.
Субвенциите не се милостина на власта на Никола Груевски, како што таа сака да ја претстави нивната наводна грижа. Субвенциите законски им следуваат на земјоделците и тие имаат законско право да ги добиваат навреме.
Сега Никола Груевски нека им одговори на луѓето кои по полињата го оставаат својот тежок макотрпен труд – каде оделе нивните пари?
Зошто сите милионски фонтани и тркала биле поважни од нивната пот“, изјави Панче Орцев.