Во текот на изминатите 24 часа на подрачјето на Град Скопје сообраќајната полиција изврши увид на вкупно 10 сообраќајни незгоди.
Од нив, осум се со последица материјална штета и две со последица телесна повреда во кои со полесни повреди се здобиле еден возач на патничко моторно возило и еден возач на мопед.
Во текот на вчерашниот ден сообраќајната полиција открила неисправност кај 13 возила, од кои 10 се исклучени од сообраќај поради утврдена неисправност кај виталните уреди, односно уредот за сопирање или, пак, уредот за управување на возилото. Санкционирала и 24 возачи кои не го почитувале ограничувањето на брзината на движење, девет возачи кои го управувале возилото по истекот на важноста на сообраќајната дозвола и девет возачи кои не го користеле безбедносниот појас или, пак, го користеле мобилниот телефон за време на управување на возилото, како и 10 пешаци.
Со помош на специјалното возило „пајак“ од сообраќајната полиција отстранети се 67 возила кои го попречувале нормалното одвивање на сообраќајот.
Отсекот за превенција при Единицата за безбедност во патниот сообраќај денеска во 19 часот во Полициската станица во Гази Баба ќе одржи сообраќајна поука за учесници во сообраќајот кои сториле прекршок непрописно запирање и паркирање.
Денеска Отсекот за превенција при Единицата за безбедност во патниот сообраќај при СВР Скопје ќе продолжи со едукативни работилници во ОУ „Братство“ кое се наоѓа на подрачјето на општина Карпош со учениците од второ и четврто одделение и во средните училишта каде што во соработка со Здравствениот дом на Град Скопје ќе одржи работилници на тема „Влијанието на алкохолот, дрогата и психотропните супстанции врз безбедноста во патниот сообраќај.
За денеска нема најавено вонредни настани со што се очекува сообраќајот да се одвива тековно и според постоечката сообраќајна регулатива.