Mомче загина синоќа во тешка сообраќајна несреќа што се случила на магистралниот пат Нови Пазар – Рашка, додека повеќе лица со повреди итно биле пренесени во болница, објавуваат српските медиуми.
Според првичните информации, трагедијата се случила откако едно патничко возило поради ненадеен дефект застанало на неосветлениот коловоз. Само неколку моменти подоцна, во него со полна брзина удрило друго возило.
Силината на директниот удар била толку голема што едниот автомобил бил целосно уништен, а предниот дел бил целосно смачкан.
За несреќниот млад човек немало спас. Лекарската екипа можела само да констатира смрт на местото на несреќата.
Останатите учесници во несреќата биле пренесени во Општата болница во Нови Пазар, каде што им била укажана лекарска помош. Засега нема официјални информации за степенот на нивните повреди, ниту за точниот број на згрижените пациенти.
Екипите на Итната медицинска помош и полициските патроли веднаш ја блокирале делницата, а сообраќајот бил целосно во прекин за време на повеќечасовниот увид.
Вештачењето и деталната истрага треба да ги утврдат сите околности, како и точната причина за несреќата.