Во случајот со Сахара груп нема штета по државата, истакнува ВМРО-ДПМНЕ во денешната реакција на прес-конференцијата на портпаролот на СДСМ, Петре Шилегов.
– СДСМ е партијата која не успеа за сите години владеење да донесе макар една инвестиција. Само да го потсетиме Шилегов и СДСМ, Владата на ВМРО-ДПМНЕ во изминатиот период успеа да привлече десетици големи странски инвестиции и компании како Џонсон Котролс, Џонсон Мети, Кемет Електроникс, Кромберт и Шуберт, Дрекслемаер, Ван Хол, Амфенол, Технохозе, Продис, Стилкон, Гришко, Суташ и други, кои отворија над 11.000 нови работни места. Едноставно, ние работиме и носиме инвестиции, а СДСМ не правеше ништо, се вели во соопштението од ВМРО-ДПМНЕ.
Во однос на политиката на привлекување на инвестиции, како што соти во текстот, Владата предводена од ВМРО-ДПМНЕ би била неодговорна доколку не би ги овозможила сите информации на кој било што сака и пројавува интерес да инвестира во Македонија.
– Во случајот со Сахара груп нема штета по државата. Поставена беше банкарска гаранција чија цел е заштита на интересите на државата. Исто така постапката во случајот со Џумајлија беше реализирана јавно и тоа со меѓународен повик. Оттука сосема е јасно дека Владата постапи одговорно, а пресовите на Шилегов се само сеење магла. Владата постапила исто како и со секој друг инвеститор. Ова покажува дека Владата се бори за секое ново отворено работно место, нешто што ќе продолжи да го прави, се наведува во соопштението од ВМРО-ДПМНЕ.