Шефот на ЕУЛЕКС на Косово Габриел Меучи изјави дека мисијата е посветена на соработката и ќе помогне на независните експрети кои ќе ги истражат наводите за корупција.
– Отворена и транспарентна надворешна ревизија е клучен чекор кон враќање на взаемната доверба меѓу ЕУЛЕКС и нашите партнери. Оваа ревизија е во сечиј најдобар интерес, изјави Меучи, по консултациите со Брисел.
Во соопштението на ЕУЛЕКС се наведува дека Меучи ја потврдил својата лична посветеност кон спроведување на политиката на нулта толеранција кон корупцијата.
Високиот претставник на ЕУ за надворешна политика и безбедност Федерика Могерини претходно најави дека ќе ангажира независни експерти за истрага по наводите за корупција во европската мисија на Косово.