Поради постоење основи на сомнение за сторени кривични дела „пустошење на шума“ и „кражба на дрва“, полициската станица од Струга поднесе кривична пријава против албанските државјани: Г.Г.(30), Ф.Ч.(15), И.Б.(35) сите од Либражд и М.К.(25) од Поградец.
Со пријавата опфатени се и Л.М.(35), П.М.(42),Л.И.(30) сите од струшкото село Франгово и А.Б. (51) од селото Радолишта.
Според портпаролот на СВР Охрид Стефан Димоски, на втори овој месец, на местото викано „Гропа“ во атарот на селото Франгово, полициски службеници од гранична полиција Регионалниот центар„Запад“ ги затекнале албанските државјани како спротивно на Законот за шуми и Кривичниот законик вршат бесправна сеча на огревно нежигирано дрво во простор од шума во државна сопственост.
– На местото пронајдени се 110 метри просторни бесправно исечени огревни дрва и шест коњи со кои дрвата требало да се транспортираат по селски пат до домовите на останатите пријавени, жители на Франгово и Радолишта. Четворицата албански државјани биле ангажирани како дрвосечачи од пријавените жители на Франгово и Радолишта за што добиле и привремено сместување. При извршени претреси во домовите и другите простории на пријавени лица од Франгово и Радолишта, се пронајдени и привремено одземени околу 22 метри просторни бесправно пресечени нежигирани дрва, информира Димоски.
Пријавените, подолг временски период организирано плански и смислено вршеле бесправна сеча на огревно дрво и нејзино транспортирање, со што го оштетиле имотот на Република Македонија односно Јавното претпријатие „Македонски шуми“ кое стопанисува со државната шума.