Двојазични табли деновиве осамнаа на вратите од државните институции во Охрид. Во подрачната единица на Фондот за пензиско и инвалидско осигурување во Охрид, покрај македонски, називите на таблите од пред некој ден се преведени и на албански јазик.
Според Законот за употреба на јазици, такви табли треба да се постават во населено место каде малцинството е поголемо од 20 %, што не е случај и во Охрид. Од Фондот за пензиско и инвалидско осигурување одговорија дека лицето задолжено за односи со јавност во моментот не било во можност да одговори за поставувањето на двојазичните табли во Охрид.
За овој случај реагираа и од опозициската ВМРО – Народна партија потенцирајќи дека со овој потег, власта сака да ги испровоцира охриѓани.
Која е целта на власта со оваа провокација за граѓаните на Охрид?! Дали власта предводена од најмакедонската партија ВМРО – ДПМНЕ има црни сценарија за Охрид и охриѓани?! Дали ова е уште еден од штетните договори со нивниот коалиционен партнер во централната политика за државата?! – прашаа од ВМРО – Народна партија.
ВМРО – ДПМНЕ самата сака да се декларира како најголем чувар на македонскиот идентитет, но со овој потег е далеку од тој епитет. А1он ќе го следи случајот и тоа дали некој ќе понесе одговорност за поставувањето на двојазичните табли во Охрид со што беа прекршени законските рагулативи.