Русија и Украина се договорија цената на гасот во текот на зимскиот период да изнесува 385 долари за илјада метри кубни, а Украина е подготвена претходно да ги исплати испораките, изјави рускиот министер за енергетика, Александар Новак.
Генералниот директор на „Газпром“, Алексеј Милер истакна дека до 21 октомври Украина треба да го реши прашањето за финансиско обезбедување на идните зимски испораки.
Рускиот претседател Владимир Путин, по средбата вчера вечер во Милано со украинскиот колега Петро Порошенко, нагласи дека Русија треба да добие од Украина минимум 5,5 милијарди долари, но е подготвена да ја преразгледа цената на гасот со последниот датум, која ја намали за 100 долари, и како резултат на тоа долгот ќе изнесува 4,5 милијарди долари.
– Вкупниот долг на Киев кон Москва веќе достигнува до 10 милијарди долари, додаде рускиот претседател.