На собраниските седници, пратениците ретко разменуваат мислења и ставови околу законските предлози. Малиот број на реплики и контрареплики по излагањата на пратениците не овозможуваат преку дебата да се тестира валидноста и издржаноста на изнесените аргументи од говорниците со што би се добиле поквалитетни одлуки во прилог на општото добро и јавниот интерес.
Ова се дел од основните наоди во првиот извештај од мониторингот на квалитетот на дебатата во Собранието кој го изведува Институтот за демократија „Социетас Цивилис“ во рамки на проектот „Собранието под лупа, засилување на политичката дебата и делиберативниот дискурс“.
– Дебата во Собранието во мониторираниот период се одликуваше со индивидуални говори на пратеници со мала интеракција меѓу учесниците на седниците. Слабата интеракција на седниците која се отсликува во значително помалиот број реплики не овозможува преку јавна дебата да се тестира валидноста и издржаноста на подготвените и изнесените аргументи на пратениците и можноста тие да бидат оспорени или надополнети. Со тоа јавноста е осиромашена од различни гледишта и аргументи кои би придонеле за изработка на поквалитетни одлуки во прилог на општото добро и јавниот интерес – пишува во извештајот.
Според податоците добиени од анализата на говорите на 20 собраниски седници во периодот од 19 јуни до 3 август, пратениците кои земале збор во најголем дел ги аргументирале своите позиции со два и повеќе од два аргументи. Во овој период тие не покажале голем интерес за аргументите изнесени од други пратеници, ниту подготвеност за менување на своите ставовите и позиции поради други подобри аргументи изнесени во текот на дебатите.
На мониторираните седници пратениците само во ретки случаи употребиле послаби форми на недоличен говор што заедно со малиот број на прекини и ограничувања укажува на моментална ниска поларизираност во работата на Собранието во мониторираниот период.
Проектот „Собранието под лупа, засилување на политичката дебата и делиберативниот дискурс“ го водат Институтот за демократија и италијанскиот Институт за Централна, Источна Европа и Балкан и е финансиран од Европската Унија.