Македонски претставници во регионалната Балканска кошаркарска лига (БИБЛ), екипите на Кожув и на Куманово, ги добија своите противници во новата сезона од ова натпреварување.
За разлика од минатата година кога Кожув и Куманово играа меѓусебно во групната фаза, сега топа нема да биде случај. Кумановчани ќе играа во „А„ конкуренцијата, каде за противници ќе ги имаат: црногорските екипи Теодо и Сутјеска, Пеќ од Косово и со Рилски спортист од Бугарија.
Кожув е во групата „Б„ во која се и екипите на: Сигал Приштина, црногорски Морнар, албанска Влазнија како и уште една екипа чие име дополнително ќе биде објавено.
Сезоната ќе започне на 14 октомври, а ден подоцна (15 октомври) Кожув ја пречекува екипата на Морнар, додека Куманово гостува во Пеќ кај истоимената екипа, во првите натпревари од седмото издание на БИБЛ лигата. Според системот за натпреварување, четирите најдобри екипи од двете групи ќе продолжат во следната фаза, која исто така ќе се игра според системот „секој со секого“, по што ќе следува плејоф.