Епидемиологот Жарко Караџоски од Институтот за јавно здравје од Скопје вели дека е намален бројот на заболени лица од жолтица во Штип и оти во изминатите четири дена евидентирани се само четири нови случаи. Според него, причината за заразата од Хепатитот А е личната хигиена.
Епидемиолозите кои денеска се по вторпат во Штип потенцираат дека водата од Градскиот водовод е квалитетна и технички исправна. Најголем процент, односно над 60 од заболените се на возраст од 0 до 29 години.
– Се на се ова недвосмислено укажува дека Хепатит А се пренесува преку контактен пат, на лицата кои што се во оваа возрасна група заради неодржувањето на личната и колективната хигиена во нивната непосредна околина, вели Караџоски.
Тој додава дека жариштата се лоцирани во населбите Каваклија Балканска, Косовска, Васил Доганџиски, Пиринска и Благоја Мучето.
Вкупниот број на заболени од жолтица во Штип за месец август и септември изнесува 56 лица. И понатаму ќе продолжат превентивните мерки во сите училишта и градинки во Штип, бидејќи периодот на инкубација на жолтицата е долг.
Екипата од Институтот за јавно здравје денеска зеде повторно мости од водата од две основни, едно средно училиште и од една локална чешма со цел да ги споредат резултатите од претходната недела за исправноста на водата.