Петстотини првачиња од општина Центар денеска влегоа во светот на знаењето.
Седумте основни училишта кои гравитираат во општина Центар подготвено ја започнаа учебната година, а на првачињата им посакаа не само успешен прв училишен ден, туку и успеси во натамошното стекнување на знаење.
Градоначалникот на општина Центар, Андреј Жерновски и советниците ја споделија радоста со нив, порачувајќи им дека училишните денови се оние најубавите, а пријателствата стекнати во училиштата – најискрени и најтопли.
Наученото, им порача градоначалникот Жерновски, секогаш се исплати во иднината, затоа учете но во никој момент ниту вие ниту вашите родители ниту наставниците не заборавајте дека вие сте и треба да бидете деца.
„Општина Центар, советниците и јас како градоначалник секогаш ќе бидеме тука за вашите потреби и желби. Вратите на општината се секогаш отворени за вас“, рече Жерновски.
Жерновски со советниците присуствуваше на првиот училишен час во ОУ „Кочо Рацин“ и во ОУ „Ј.Х. Песталоци“, каде што учениците оваа учебна година ја почнувате во нови подобри услови, реконструирани подови во фискултурната сала и реконструирана аула.
