Рускиот претседател Владимир Путин и украинскиот претседател Петро Порошенко може да имаат одвоена средба утре во Минск, изјави портпаролот на Путин, Дмитриј Песков.
– Не ја исклучуваме таа можност, додаде тој.
Песков нагласи дека на средбата би се разгледале повеќе теми, меѓу кои и укрианската криза, хуманитарната катастрофа во источните украински региони, неопходноста од спречување на огнот.
Двајцата лидери може да разговараат и за билатералните односи, вклучувајќи ја и спогодбата за асоцијација која Киев ја потпиша со Европската унија.
Претседателите на Русија, Белорусија и Казахстан, трите членки од Царинската унија, ќе разговараат утре во Минск со претседателот на Украина, а на средбата ќе присуствуваат и претставници на Европската комисија, високиот претставник на ЕУ за надворешна политика и безбедност Кетрин Ештон, еврокомесарот за трговија Карел де Гухт и еврокомесарот за енергетика, Гинтер Етингер.