Францускиот тенисер Жо-Вилфред Цонга триумфираше на Мастерс турнирот Роџерс Куп во Торонто, откако синоќа во финалето го победи Швајцарецот Роџер Федерер со 2-0, по сетови 7:5 и 7:6. Мечот траеше еден час и 49 минути.
За Цонга ова беше 11 трофеј во кариерата и втор од Мастерс 1000 серијата. Тој воедно е првиот Французин што победува на Роџерс Купот.
На патот до финалето каде беше поуспешен од најтрофејниот светски тенисер, Цонга ги елиминира Новак Ѓоковиќ – првиот на АТП листата, Енди Мареј, Григор Димитров, Едуард Роже-Васелан и Жереми Шарди.
По овој успех, Цонга од денеска повторно ќе биде во ТОП 10 на АТП листата.
За победата во Торонто францускиот тенисер ќе добие 600 илјади долари, а Федерер двојно помалку.