Концесионерите на плажите во Охрид се соочуваат со нелојална конкуренција. Дел од плажите по должината на Охридското Езеро не се издадени под концесија, а сепак се узурпирани со лежалки додека на некои се служат и храна и пијалаци. Приватниците кои имаат објекти со сместувачки капацитети ги имаат узурпирано и плажите пред тие објекти, а немаат потпишано договор за нив.
Безбедноста на капачите на тие плажи исто така не е овозможена. Претседателот на Црвениот крст од Охрид, Сашо Точко за А1ОН вели дека ситуацијата е иста како и претходните години.
Седум плажи на Охридското Езеро се без услови за безбедност, а се узурпирани и се користат плажите, што е чиста злоупотреба. Немаат ништо, ниту спасители ниту пак плажата е обележана. Истата состојба е и во Струга – вели Сашо Точко.
Од друга страна, оние концесионери кои имаат потпишано договор за плажите и кои редовно ја плаќаат концесијата, секојдневно се соочуваат со инспекции. Тие се револтирани од таквиот однос на државата кон нив, но се и уплашени да проговорат јавно за овие проблеми, сметајќи дека уште наредниот ден ќе се соочат со високите казни од инспекциските служби. Кај оние плажи кои не се издадени под концесија, а се користат инспекциите нема ни кај кого да вршат контрола. Единствено што можат да сторат е да ги подигнат незаконски поставените лежалки или објекти, но институциите се неми за сето ова.
Општинскиот инспекторат од Општина Охрид и Капетанијата како да сакаат да останат глуви на овие незаконски узурпации. Секојдневно во медиумите гледаме како Бакрачески и општинскиот инспекторат ќе воведувале ред и ќе отстранувале се што е нелегално поставено на општинско земјиште, но плажите и годинава никој не ги чепка. Туристите немаат безбедност, општинското земјиште е узурпирано, а поединци имаат голем профит од тоа.
Неколку најатрактивни плажи на охридското крајбрежје ги поседуваат моќници блиски до власта, а немаат склучено договор за користење. Ова е уште еден пример како во Република Македонија функционираат законите и како селективно се врши контрола врз угостителските објекти.
Филип Јовановски