Во Норвешка само 5 отсто од трансакциите се извршуваат во кеш, останатото се реализира преку платежни картички, констатира норвешката финансиска корпорација „Finans Norge“ која се залага за целосна замена на плаќањето со кеш во корист на платежните картички за да се спречи, меѓу другото финансискиот криминал кражбите и „црните пари“.
Според оваа институција овој процес би требало да се заврши до 2020 година.
– Плаќањето во кеш претставува така мал процент во општеството, што можеме и без него – велат од норвешката финасиска корпорацијата „Finans Norge“.
Спротивно на оваа институција аналитичарите предупредуваат дека финасискиот криминал не зависи само од начинот на реализирање на трансакциите, но затоа пак отстранувањето на кешот како можност за плаќање би значело атак врз системот на слободно плаќање.
– Мислам дека е наивно да се верува дека криминалот ќе исчезне со повлекување на кешот. Сведоци сме дека криминалот ги опфаќа сите сегменти, а банката и електронскиот начин на плаќање не се исклучок – вели аналитичарот Гури Мелби.
Освен во Норвешка, намалена употреба на кеш забележана е во Шведска и Велика Британија.