Проруските сепаратисти сметаат дека за објективна истрага за причините за вчерашната несреќа на патничкиот авион „Боинг-777“ на „Малезија ерлајнс“ не е неопходно примирје, јави ИТАР-ТАСС.
– Борбените дејствија продолжуваат на целиот фронт. Местото на паѓањето на „Боингот“ се наоѓа длабоко на наша територија и не се потребни никакви „хуманитарни примирја“ или „коридори“ за објективна истрага за причините за трагедијата, изјави „министерот за одбрана“ на т.н. „Доњецка Народна Република“, Игор Стрелков.
– Комисијата може слободно да пристигне и да го испита местото на падот на авионот. Никој нема да и прави пречки. Но, нецелисходно е и запирањето на борбените дејствија против опколената група на противникот, смета Стрелков.
Малезискиот авион, што летал од Амстердам за Куала Лумпур, синоќа падна на територијата на Украина во регионот на населеното место Грабово во Доњецката област. Во несреќата загинаа 298 лица, од кои 283 патници и 15 членови на екипажот.