Од наредниот месец ќе се плива маратон и во Велешкото езеро. Неколкумина ентузијасти одлучија силите и вештините во пливање да си ги одмерат на пливачка патека долга пет илјади метри, пренесува Канал 5 телевизија.
Вчера на езерото Младост се одржа пробен маратон, додека официјално маратонот ќе се одржи во втората половина на август во водите на Велешкото езеро. Иницијативаната ја поддрживаат и прославениот маратонски ас Дики Бојаџи, маратонците Тони Стефановски и Бошко Илиев.
Тимот од дваесеттина млади искусни пливачи го предводеше докторот во спортска медицина Бошко Илиев од Кавадарци, искусен маратонец со учество на триесетина маратони. На овој начин тие дадоа личен придонес во идејата „Младост“ да прерасне во туристичка атракција.
Според Илиев езерото има одлични услови за одржување на трка од ваков тип. Стартот на пробрната трка го означи Дики Бојаџи, кој маратонската патека ја оцени како одлична за помладите маратонци, бидејќи езерото не е многу пространо.
