Рускиот министер за надворешни работи Сергеј Лавров изјави денеска дека во телефонски разговор со шефовите на германската и француската дипломатија Франк Валтер Штајнмаер и Лоран Фабиус побарал што побрзо да се одржи состанок на меѓународната контакт група за Украина.
Тој истакна дека е неопходно да се применат договорите, кои министрите за надворешни работи на Германија, Франција, Русија и Украина ги постигнаа на 2 јули во Берлин и да се свика состанок на контакт групата, со цел на Киев и претставниците на југоисточна Украина да им се овозможи да разгледаат безусловен и траен прекин на огнот.
Руското МНР соопшти дека украинската војска ја интензивира воената операција во источна Украина, што го зголемува бројот на цивилните жртви и ја уништува инфраструктурата.
– Многу сме загрижени поради фактот што воените дејства во Украина се проследени со гранатирање на руска територија и тоа создава пречки за бегалците кои сакаат да ја напуштат зоната на судири, се наведува во соопштението на руското МНР објавено на Фејсбук.
Штајнмаер и Фабиус се согласиле дека контакт групата треба итно да продолжи со рбаота. Тие израиле подготвеност да употребат се што им е на располагање за да изберат место за одржување на состанок меѓу претставниците на украинските власти и лидерите на проруските сили, со посредување на Русија и Организацијата за безбедност и соработка во Европа (ОБСЕ).