Основниот суд во Урошевац, на двајцата џихадисти од косовскиот град Качаник, кои деновиве ја хулеа бистата на Ѓерѓ Кастриот-Скендербег во центарот на градот, им го продолжи притворот за уште триесет дена.
Арбен Бериша (37) и Јетон Вербани(40) ќе одговараат за „поттикнување верска, етничка или расна нетрпеливост“, дело за кое косовскиот законик предвидува казна затвор во траење до осум години, јави дописникот на МИА.
И двајцата се членови на т.н. невладина организација „Ринија исламе-Kачаник“ (Исламска младина – Kачаник), која не е регистрирана. Нејзин лидер, или емир како што го нарекуваат, е Лавдерим Мухаџери, од Качаник инаку водач на албанските џихадисти во Сирија, додека заменик на емирот е Илир Бериша, кого полицијата го уапси со уште двајца други минатата недела, под обвинение за тероризам.
Цел кон средината на јануари годинава беше и бистата на Мајка Тереза во јужниот дел на Митровица, која непознати вандали ја турнаа од постаментот. Ваквиот чин тогаш го поздрави Форумот на млади Муслимани на Косово, кој е дел од исламското движење „Приклучи се“. Форумот смета дека Мајка Тереза е Влаинка од Скопје, а Ѓерѓ Кастриот е Србин, а нивните споменици се резултат на „насилниот и противзаконски процес на покатоличување и србизација на Kосово“.
По последниот вандалски чин организацијата, преку соопштение, истиот го смета за демократски чин на изразување на незадоволство, а од Владата на Македонија и на Косово побара од јавните плоштади да ги отстранат спомениците на хероите христијани и препорачуваат нивните бисти да ги постават во дворовите на црквите.