Потпретседателот на Собранието на Република Македонија и член на Делегацијата во Интерпарламентарната унија Јани Макрадули, ќе учествува на Светската конференција за е-парламент, што ќе се одржи од 13 до 15 септември 2012 година во Рим, Италија, соопшти собраниската прес-служба.
На конференција, што ја организираат Интерпарламентарната унија и Обединетите нации, ќе учествуваат високи претставници од парламентите, меѓународните организации и експерти од областа на информатичките и комуникациските технологии.
Учесниците на конференцијата ќе дискутираат за статусот на ИКТ во парламентите, слободата на пристап до информации, влијанието на технологијата врз отвореноста и отчетноста на парламентите, иновациите во парламентарната комуникација, предизвиците од новите медиуми за парламентите и пратениците.
Предвидено е Макрадули да претседава со работната сесија на тема „Предностите и вредностите од достапните информации за поттикнување на поголема транспарентност на парламентите“.
Во рамките на конференцијата ќе биде одбележан 15-ти септември, Меѓународниот ден на демократијата.