Контроли во 230 складови за дрва, изречени глоби во износ од 400 илјади евра

Полицијата и инспекторатите вчера направија контрола на 230 складови за дрва при што изрекоа прекршоци во вкупна глоба од околу 400 илјади евра и запленија над 503 илјади метри кубни дрва.

– Во текот на вчерашниот ден МВР во содејство со неколку други надлежни институции пред се УЈП, Пазарната инспекција и инспекторатите од областа на шумството и ловството, направи контрола во околу 230 складови за дрва каде што беше проверена целокупната документација и притоа беа констатирани различни бројни прекршоци. Вкупната глоба на изречени прекршоци е околу 400 илјади евра. Ако на тоа се додаде дека се запленети над 503 илјади метри кубни дрва тогаш станува збор за една успешна акција на полицијата и надлежните институции кои практично со една ваква координирана активност настапија во функција на контрола на оние кои би требало да вршат заштита на дрвниот фонд, изјави Јанкулоска.

Во контролите, како што соопшти МВР, беа вклучени вкупно 827 полициски службеници од кои 506 униформирани полициски службеници, 251 припадници на крим-полицијата и 70 припадници од Посебните единици на полиција. Исто така во активностите беа вклучени и 110 инспектори од Управата за јавни приходи, 78 инспектори од Државниот пазарен инспекторат, 25 припадници на Државниот инспектори за шумарство и ловство, а по потреба се вклучуваа и припадници од Трудова инспекција и Шумската полиција.

Согласно планираните мерки и активности од страна на секторите за внатрешни работи планирано беше да се извршат контроли во 241 објекти,  каде што се врши продажба на огревно дрво, а контроли се извршија во Скопје во 34, во Куманово-26, Тетово-21, Велес и Струга по 17, Берово и Прилеп по 12, Радовиш-11, Струмица-10, Гостивар-9, Кавадарци, Орхрид и Штип по 8, Кочани-7, Битола и Делчево по 5, Неготино-4, Виница, Демир Хисар и Свети Николе по 3, Валандово, Крушево и Свети Николе по 2 и Гевгелија, Кичево и Македонски брод по еден објект. Во девет објекти контролата не беше спроведена бидејќи објектите беа затворени.

За време на контролите од страна на Управата за јавни приходи согласно Законот за готовинско плаќање прекршоци се констатирани во 59 објекти (11 – Велес, 10 – Скопје, 7- Тетово, 6 – Струга, 4 – Кочани, 4 – Демир Капија, 4 – Берово, 4 – Гостивар, 3 – Штип, 2 – Охрид, 1 – Струмица, 1 – Радовиш, 1 – Куманово и 1 – Кичево), за кои се донесени решенија за затворање и се изречени глоби од по 3.250 евра (2.500 евра за правното и 750 за одговорното лице во правното лице) или во вкупна вредност од 191.750 евра. Исто така, во три складишта во Тетово, Струга и Гостивар е утврдено дека не се води дневен финасиски извештај за што се изречени три глоби во вкупен износ од 8.400 евра.

Државниот пазарен инспекторат констатираше 83 прекршоци од Законот за трговија и Законот за метрологија (Скопје – 12, Струга – 10, Куманово – 9, Штип – 6, Берово – 6, Велес – 6, Охрид – 5, Тетово – 5, Кичево – 4, Гостивар – 4, Прилеп – 4, Делчево – 3, Виница – 3, Радовиш – 3 и по еден прекршок во Струмица, Валандово, Гевгелија и Македонски брод) при што се изречени глоби во вредност од 173.600 евра.

Министерството за внатрешни работи чија основна улога беше овозможување безбедно и непречено одвивање на контролите, како и координирање на државните институции, досега документираше едно кривично дело на подрачјето на Битола по член 235 ст.3 од КЗ, потоа против еден сопственик на складиште на подрачјето на Велес ќе поднесе барање за поведување на прекршочна постапка за сторен прекршок по чл. 4 од ЗППЈРМ, а во четири случаи при сообраќајна контрола се откриени возила кои нелегално пренесувале дрва.