Полициски службеници од полициските станици за граничен надзор „Охридско Езеро“, „Стар Дојран“, „Маркова Нога“ и „Стење“ деновиве во Охрид се обучуваат на тема „Спасување на давеник во вода“ и „Обука за укажување на прва помош“.
СВР Охрид денеска соопшти дека обуката за спасување на давеник во вода ја спроведуваат сертифицирани инструктори од Црвениот крст – Охрид, а во обуката за укажување на прва помош, покрај од охридскиот Црвен крст, вклучени се и инструктори од Англија.
– Теоретскиот дел за припадниците на граничната полиција се изведува во просториите на Црвениот крст, а практичните вежби на крајбрежјето, како и во водите на Охридското Езеро. Во завршниот дел е предвидено, по однапред подготвено сценарио да се симулираат мерките за спасување на давеник и давање прва помош, преку што ќе се врши оценување на полициските службеници за нивните стекнати вештини и знаења за спасување давеник, информира СВР Охрид.