Кабинетот на високиот претставник на ЕУ Кетрин Ештон денеска порача дека кој и да формира влада во Косово, ЕУ очекува од нив да продолжат со дијалогот со Белград и воедно, да ги спроведува постигнатите договори, објави весникот Зери.
– Очекуваме новите власти во Приштина да продолжат со дијалогот и имплементација на Договорот од 19 април 2013 година – вели портпаролот Маја Коцијанчич за весникот.
Иако еден од условите на Самоопределување е дијалогот со Србија да се стави во мирување, кандидатот на ДПК и АИК за косовски премиер Рамуш Харадинај изјави дека дијалогот ќе продолжи.
– Дијалогот со Белград нема да прекине. Напротив, треба да се види што може да добиеме од тој дијалог – изјави тој за приштинскиот весник.